February 7, 2020
DUMAGUETE CITY – Nisaka na og walo ang mga giobserbaran sulod sa Negros Oriental Provincial Hospital (NOPH) tungod sa 2019 Novel Coronavirus – Acute Respiratory Disease (nCoV-ARD).
Matod sa spokesperson sa Kapitolyo sa Lalawigan sa Negros Oriental, Bimbo Miraflor, gikan sa pito, nisaka og walo ang ilang gitawag nga Persons Under Investigation (PUI). Nadugangan kini sa pagtahan sa usa ka staff sa hotel diin nipuyo ang duha ka Chinese National nga nagpositibo sa NCoV-ARD, human nakasinati’g ubo ug sipon, mga timailhan sa makamatay nga virus. Gihuwat nalang ang resulta sa swab test sa hospital staff gikan sa Research Institute for Tropical Medicine (RITM) kun natakdan kini sa nCoV-ARD.
Si Dr. Liland Estacion, Assistant Head sa Integrated Provincial Health Office, nibutyag nga nagnegatibo sa virus ang laing upat ka mga PUI nga naka-confine sa NOPH base sa unang test sa RITM. Ipaubos sa ika-duha ug katapusang test ang mga PUI aron masiguro nga wala sila matapti sa sakit. Magdepende sa assesment sa mga health authoroties kun pagawson sila gikan sa isolation bisan nagnegatibo sa makamatay nga virus.
Matod sa kapitolyo, sa karon, lima ka mga PUI ang gikan sa mga establishimento nga gibisita sa duha ka Chinese National; usa ang tapad nila sa eroplano; usa ang gikan sa Taiwan; ug usa ang nibyahe gikan Hongkong. Apan matod ni Dr. Estacion, maayo ra ang kahimtang sa panglawas sa walo ka mga PUI. Nagpabilin sa 38 ang ihap sa mga Persons Under Monitoring (PUMs) kun ang mga gi-quarantine ug gibantayan sa IPHO ug Department of Health sa ilang mga balay.
Epekto sa Ekonomiya
Giangkon usab ni Miraflor nga nakaapekto sa ekonomiya sa lalawigan ang hulga nga dala sa 2019 nCoV-ARD. Apan matod ni Miraflor nga giuna ni Negros Oriental Governor Ruel Degamo ang seguridad sa katawhan kay sa ekonomiya nga mahimo pa nila pabarugon og balik.
Wa’y klase?
Tun-an pa usab sa kapitolyo kun ipadayon ang pagsuspenso sa klase sa sunod semana. Kahinumduman, gisuspenso sa kapitolyo ang tanang klase sa elementarya, high school, ug koleheyo sa mga pampubliko nga tunghaan sugod Enero 5 hangtod 7, 2020 tungod sa hulga sa virus.
